Warning: Creating default object from empty value in /home/passi/public_html/wp-content/themes/canvas/functions/admin-hooks.php on line 160

Fillet met Rissie en Kersiesous

Vir die meeste van ons is die begin van die jaar nie juis gevul met opwinding nie. Inteendeel, die jaar begin met spitsverkeer, skool, of jou baas wat nog steeds nie ‘n beter persoonlikheid ontwikkel het nie. Vir een of ander rede het al jou klere in die kas ook gekrimp. Die resultaat? Jy voel sommer “af”.

Dan kom Saterdag en die kans om ontslae te raak van daardie “af” gevoel. Bederf jouself met die volgende dis, en voel sommer beter aangesien die resep rissies, vars kersies en donkersjokolade bevat.

  • Rissies, asook donkersjokolade, stel endorfiene in die liggaam vry, wat natuurlike pynstillers is en jou oor die algemeen beter laat voel. Daar is selfs al beweer dat die hoë inhoud van kakao in sjokolade depressie beveg. Natuurlik is net een blokkie, en nie ‘n kilogram nie, per dag nodig.
  • Kersies en donkersjokolade bevat albei antioksidante, wat help om die selle in jou liggaam te beskerm.

Filet bedien op ‘n aartappelpoffertjie, saam met ‘n rissie- en kersiesous. ‘n Lekker bygereg hierby is ratatouille.

 Vir die filet:

  • 1 kg filet (kamertemperatuur)
  • 100 g botter
  • 15 ml olyfolie
  • 1 rissie (fyngekap) of meer na smaak
  • 1 blokkie Lindt-rissiesjokolade
  • 250 ml room
  • 50 ml brandewyn
  • 25 ml kersielikeur
  • 10 vars kersies, ontpit en fyngekap
  • 4 vars kersies, heel
  • 15 ml fyngekapte roosmaryn
  • Sout en peper na smaak

 Vir die aartappelpoffertjies:

  •  3 groot aartappels, geskil en gekook
  • 10 ml Maizena
  • 70 g botter
  • 2 eiers
  • Sout en peper na smaak

 Vir die ratatouille:

  •  1 rooi soetrissie (gekap in 1 cm x 1 cm-blokkies)
  • 1 groen soetrissie (gekap in 1 cm x 1 cm-blokkies)
  • 1 geel soetrissie (gekap in 1 cm x 1 cm-blokkies)
  • 1 ui (fyngekap)
  • ½ blik Italiaanse tamaties (gekap, en behou die sous)
  • 10 Rosa-tamaties
  • 1 vars knoffelhuisie
  • 1 murgpampoentjie, in dun skyfies gesny
  • 30 ml olyfolie

Voorverhit die oond tot 180° Celsius, en smeer ‘n bakpan vir die aartappelpoffertjies. Druk die aartappels fyn terwyl dit nog warm is en voeg die botter en Maizena by. Sodra dit bietjie afgekoel het, voeg die eiers by en klits vinnig. As die aartappels nog te warm is, sal die eiers begin gaarword, en dit moet jy verhoed! Skep die aartappels in vier porsies op die bakpan. Die mengsel behoort effens pap te wees. Indien nie, kan jy nog botter byvoeg. Bak dit in die oond vir ± 10 minute of tot dit begin rys en goudbruin aan die bokant is.

Sny die filet in vier ewe groot porsies. Smelt die botter in die pan oor ‘n redelike hoë hitte en voeg die olyfolie by, sonder om die botter te laat bruin word. Seël die filetporsies behoorlik aan albei kante.

Vir ‘rare’, plaas jou wysvinger en duim teenmekaar en druk op die kussing van jou palm met jou ander wysvinger. Die filet behoort dieselfde sagtheid te hê as die kussing van jou palm.

Vir  ‘medium’, plaas jou middelvinger en duim teenmekaar, en herhaal soos hierbo genoem.

Vir ‘medium-well’ gebruik jou ringvinger en duim.

Vir karton, jou pinkie.

Haal die filet uit die pan en voeg die brandewyn, likeur, kersies, roosmaryn, en sjokolade in die pan. Flambé die sous om die alkohol te laat verdamp. Voeg daarna die room by, en laat dit prut tot die sous effens verdik.

Terwyl die filette in die pan braai, voeg die olyfolie in ‘n skoon pan en verhit oor ‘n matige hitte. Soteer die uie en knoffel in die olie. Sodra die uie amper deurskynend begin raak, voeg die tamaties en soetrissies by. Soteer vir vyf minute. Voeg die geblikte tamaties, asook die sous by en laat dit prut vir ‘n verdere vyf minute.

Onthou om jou sous en ratatouille te proe om seker te maak daar is genoeg sout en peper by.

Om te bedien, plaas die filet op die aartappelpoffertjie, en gooi ‘n bietjie van die sous bo oor. Plaas ‘n vars kersie bo-op elke filet vir garnering, saam met ‘n klein stukkie roosmaryn. Die ratatouille word aan die kant bedien.

Subscribe

Subscribe to our e-mail newsletter to receive updates.

Comments are closed.